Degun davagnadú tl derby de Mareo 1:1
N domënia sá les döes scuadres de Comun confronté tl derby de Mareo. Na partida plajora por i tröc spetadus roá adalerch.
Sön n ciamp en condiziuns perfetes pëia ia i ghesc cun gran slöm. Do da püc minuc el Paolo che chir l gol con n bel tiro da fora d'area. Manuel deviëia l palé sura porta fora. L Rina mess ciaré da se defëne. Al 12.minut el endo Paolo che la proa. Söa poniziun püch fora d'area va ma de n meter dlungia l'incrujada dal set ia. Plü che i minuc passa, plü el ince i patruns de ciasa che röa te partida. La pröma bona ocajiun ti gareta a Manfred. So colp de cé do da na trata da ciantun va ndere alta sura porta. L medemo á püch dedo ndo na bona ocajiun, feter la miú por l Rina tl pröm tomp. L portier von Wenzel né nia bun da se apié l palé sön na poniziun. Cösc ti röa dan i pisc a Manfred che slopeta da bona posiziun l palé dlungia porta ia. L Rina drucha inant y ince l atacant Klaus se lascia odëi. Cun na driblada se portel ite cuntra porta, söa trata ti fej l polan ala stangia dl piz lunch. Ince l Mareo á dan la fin dl pröm tomp feter la medema ocajiun. L atacant Marco sciampa da na pert jö y se tira ite cuntra porta. Ince söa trata ne röa nia a destinaziun y passa püch dlungia stangia ia. Les döes scuadres ti a pité ai spetadus n bel pröm tomp cun valch bela sogada y tröpes ocajiuns.

Tl secundo tomp el i patruns de ciasa che vëgn cun gran convinziun fora de cabina. Do da tan de ocajiuns tofera da gol. Insciö era spo ince. Al 59.minut el Thomas che ti fej n bel passaje al capitan Andreas. Cun furbizia alza Andreas l palé sura l portier. L coran se arbassa al dërt moment y röa te rëi por l 1-0. Do da l gol el l Rina che drucha inant. La miú ocajiun por porté l resultat söl l 2-0 á Alfons. Klaus crossëia t'area olache l sogadú dl Rina mët l palé de cé püch sora porta fora. Con l tomp el l Rina che perd les forzes y aretrëia tres deplü. L Mareo ciafa coraje y met man da fa jüch. I ultimi vint minuc el ma plü i ghesc che soga deperpo che l Rina se defënn con mans y pisc. Al 75.minut el Thomas C. che abina l palé te posiziun dezentrada d'area. Cösc lascia pié ia na gran trata de ciamp che röa tl incrujada dles stanges de porta. A diesc minuc dala fin era spo tan inant. Paolo tira na poniziun t'area olache i defensurs dl Rina né nia bugn da trá demez l palé. Marco posizioné tl dërt post ti dá na spizorada y mët l coran te sach por l 1-1. Desco bele dit né l Rina nia plü bugn da reagí. Al gareta valch cuntrapé mo i atacanc né nia bugn da cherié gran prigo. L Mareo fej inant jüch y proa da roé a conclujiuns mo gnanca a ëi ne ti garetl de gran ocajiuns da gol.
Insciö se röa la partida sön l 1-1, che è ince n resultat iüst. L punt porom ne ti porta ndere a ntrames les scuadres nia tröp. Dandaöt l Rina á sen ora da fa punc, porchel periun düc i sostegnidus da gní n domënia a sostegni nosta scuadra por cal gareti finalmonter la pröma devënta.

Formaziun:
1)Manuel H.,2)HansPeter R.,3)Manuel M.,4)Manfred P., 5)Huber T.,6)Rungger L.7)Lorenz R.,8)Winkler M.9)Michael R.,10)Ferdigg A., 11)Klaus P.

Cambi:
60.minut: Michael R.-Gatterer
63.minut: Lorenz R.-Filip P.
79.minut: Ferdigg A.-Fidelis P.

Goi:
51.minut, Ferdigg A., 1-0
79.minut, Marco M., 1-1