Unsere Sponsoren

Secunda devёnta indolater 2:1
N bun pröm tёmp y na buna defenjiun tla secunda pert de jüch ti basta al Rina por se porté a ciasa 3 punc y se mantigní le cuinto post.
Tla secunda partida de retüda él le Rina che soga te ciasa cuntra la scuadra de Perha. I ladins mёss ciaré da davagné por se mantigní le cuinto post y se porté plü daimpró ai cuarc. La partida mёt man cun la formaziun de ciasa che comana le jüch y ne conzed tan co degöna lerch ai aversars. Bele ti pröms menüc de jüch ti garetel ai patruns de ciasa bones ocajiuns da se porté in vantaje.
La bona fasa iniziala vёgn sfrutada bun y insciö garetel al 14' menüt le gol dl vantaje. Klaus P. lascia pié ia na gran trata da na posiziun plütosc angolada, le portir ne é nia bun da se apié le palé y til mёt sön i pisc a Andreas F., che á madёr plü bria da le paré te porta. Le gol y le sostёgn di tröc spetadus ti dá al Rina na gran forza. Al 18' menüt él Michael R. che porta n bun palé t amez, olache Klaus P. le mёt jö por David C. che cun na gran trata dal limit dl area plazёia le palé tl ciantun bas y mёt a sёgn so pröm gol cun le Rina, portan i ladins sön le 2-0. Le Rina ne se lascia nia do fora y mantёgn le control dl jüch por le rest dl pröm tёmp, cherian deplü ocajiuns da se porté sön le 3-0. Incёr la fin dla pröma pert de jüch él Andreas F. che atoca la traversa cun na bela trata de cé cun le portir aversar bele batü. Ti ultims menüc dan la interuziun á ince i ghesć dёr na bona ocajiun da segné, mo le jonn portir dl Rina Giovanni E. ne se lascia nia superé y tol le palé demez dala incrujada cun na gran parada.

Le secundo tёmp ne mёt nia man tan bun co le pröm. I ladins se presёnteia cun manco convinziun y ti conzёd tröpa lerch ai aversars amesa le ciamp. Impo ti ési i ladins da rové n valgügn iadi dan porta, olache al é madёr la conclujiun finala che despartёsc le Rina dal gol dla segurté. Cun le passé dl tёmp él les forzes che lascia do y insciö se porta i ghesć do n chert d'ora de jüch sön le 2-1. Sön chёsta se tira le Rina zoruch y ciara da defёne le resultat por i menüc che resta. Tla fasa finala él ma plü i aversars che soga y manacia tröc iadi da rosedé le resultat. Canche la defenjiun de ciasa se lascia sciampé n atacant aversar vёgn Giovanni ciamo n iadé cherdé a fá na parada miracolosa y salva insciö le resultat. Bel ala fin röia le palé te area a n atacant bel su, che vёgn tigní sö dal diretur de gara por na posiziun de foradejüch. Do da bёgn 5 menüc de recuper conzedüs dal arbiter se röia finalmёnter la partida y le Rina po insciö se ralegré cun na dёventa tla pröma partida de retüda te ciasa.
Do da n pröm tёmp dominé mёss le Rina se paré cun mans y pisc por ti la fá ai aversars da Perha. Cun na gran conzentraziun da pert di defensurs ti é i ladins da se defёne cina al sciüre final y da se asiguré la secunda devёnta indolater. Le Rina é sёgn cun 19 punc al cuinto post cun n destach de 4 punc dai cuinc, y a -2 dai cuarc. (dc)


N bun mёteman 0:1
N edema do la secunda categoria él ince la terza che mёt indo man. Le Rina á la miú cuntra la formaziun da Prettau y se porta insciö a ciasa trёi punc importanc.
Tla pröma partida de retüda tl rode C de terza categoria él le Rina che afrontёia la scuadra da Prettau. La partida mёt man a ritms basc, cun püces ocajiuns concretes por intrames les scuadres. Ince sce al é i ladins che comana le jüch, ne ti ési nia da rové pormez ala porta di aversars, che é bugn da se paré cun na gran agresivité. Cun le passé dl tёmp él i ladins che mёt man da soghé cun tres plü confidёnza y se porta ince val iade daimpró ala porta di aversars, dailó él indere la conclujiun finala che lascia a dejidré. Danter les püces ocajiuns cheriades, él feter i aversars che á la miú dl pröm tёmp. Sön na trata dal ciantun él n sogadú da Prettau che lascia pié ia na gran trata sön porta y manacia prёsc da segné diretamёnter dal ciantun. Mo le portir Michael M. ne se lascia nia sprigoré y para le palé dalunc dal prigo.

Tl secundo tёmp se prejentёia le Rina te n atra manira. I ladins aministrёia le palé cun na gran convinziun y mёt insciö man da dominé la partida. Cun na gran determinaziun röiei te deplü ocajiuns pormez al vantaje. Do da incёr diesc menüc él David H. che ciafa le palé püch defora dal area, driblёia na schira de sogadus aversars, tuc dala morvёia dala gran abilité tecnica dl atacant ladin, y mёt le palé te porta cun na gran trata diagonala che straifёia la stangia.
I aversars ne é nia bugn da se refá y le Rina romagn la scuadra che dominёia le jüch. Püch do le gol á David H. ciamo n iade na bona ocajiun dal limit dl area, mo la trata ne abina nia le spidl dla porta. Le Rina devёnta plü gonot prigorus cun palés lunc che Andreas F. é bun da spizoré sora fora por mené i atacanc cuntra le portir da Prettau. Mo ara ne ó nia ester y le gol por stlü la partida ne gareta nia. A diesc menüc dala fin él n sogadú aversar che vёgn puní cun la mascima sanziun do na burta entrada sön Thomas H.. Ti ultims menüc é la defenjiun da Prettau a tera y ti conzёd tröpa lerch ai ladins, che ne é indere nia bugn da finalizé. Ince i aversars pro ciamo n valgügn iadi da se refá, mo i ladins é bugn da se paré cina ala fin y da se to a ciasa trёi punc de valüta.
Ince sce al é ma sté öna na scuadra te ciamp, ne n'él impo ne nia sté tan saori da davagne co che an minâ. Cun n vantaje de un n gol su él sté da mёt averda cina al sciüre final por se asiguré i trёi punc. Insciö se porta le Rina a 16 punc te classifica y mantёgn le cuint post, a -4 dai cuarc. (dc)


 

 

Volksbank